Etter den lange covid-nedstenginga av både samfunn og kulturaktivitetar var det stor stas då Storstova opna for konserten «Ticket to ride» med Underholdningsvogna.

Til saman 50 gjestar fekk gleda av ei strålande framsyning utan dødpunkt, der artistane tok dei med på ei musikalsk reise frå New York til Paris. Konsertopplevinga gav assosiasjoner til tida då damplokomotiva tøffa gjennom Europa og dei store dampskipa frakta lykkejegrar og turistar til Amerika.

Låtar frå Edit Piaf, Ella Fitzgerald, Django Reinhardt og The Beatles, og songar som “Les Champs Elysées”, “That’s amore!” og “Manhattan” kom som perler på ei snor. Publikum song med på refrenga og klappa takten. Småbord med kaffi, lefse og twist gjorde heilskapen perfekt. Det var tydeleg at mange var glade for endeleg å få ei lokal kulturoppleving att – konserten vart avslutta med ein ståande, lang applaus.
Det var Alver kommune si kulturavdeling i samarbeid med den fylkeskommunale ordninga «Den kulturelle spaserstokken» som finansierte forestillinga, som dermed kunne vera gratis for publikum.