Er det ein haug me er glad i så er det Gladihaug!

Gladihaug pokalen har vore eit populært og motiverande tiltak for folkehelsa i lang tid.

Det er Jon Arne Hopsdal som held greie på bøkene og legg ut nye når det trengs, og frå 2022 er det Jesper Munch som tel opp og lagar statistikk, sirleg oppstilt i Excel-ark. Både alfabetisk og etter antall turar. Me er glad for at Jesper tek Gladihaug-oppgåva slik på alvor at han no tek utdanning som arkeolog. Han har vist ei framifrå evne til å grava seg ned i turbøkene. Til alt overmål har Jesper i 2025/2026 ikkje berre site bøygd over bøkene, for å sitera Olav H. Hauge, men faktisk i all beskjedenhet tatt turen til toppen og fått ein fin 569ende plass på resultatlista. Imponerande!

Ja. Sjølv om juleførebuingane hindra Steinar Hopsdal i å finne tid til meir enn éin tur til toppen av Gladihaug i desember, blir han med 122 signaturar i turboka – og etter mange års tilløp – den best plasserte 2025-turgåaren som ikkje tidlegare har motteke pokalen.

Som det var tilfellet både i 2023 og 2024, er det igjen i 2025 Cecilie Selvik som har vore flest gonger oppe og nyte utsikta frå toppen av Gladihaug. 260 turar er einsbetydande med ei imponerande plassering framfor dei 964 andre turgåarane som har skrive seg inn i turboka. Cecilie vann pokalen i 2017, og held ho 2025-kadensen i inneverande år, betyr nye reglar at ho kan vinne pokalen på nytt i 2026.

965 personar tok turen til toppen av Gladihaug i 2025 og skreiv seg inn i turboka. 771 av desse hadde fått nok etter éin enkelt tur. Til saman vart namn skrive inn i turboka 2930 gonger. Det er vesentleg fleire enn i fjor (2577).

Bygdelaget vil gjera merksam på at me vedtok ei endring av statuttane for Gladihaugpokalen på årsmøtet i 2024 , før var det slik at du kunne vinna pokalen ein gong i livet, no er statuttane endra den som får pokalen har fem års karantene. Endringa gjeld med verknad frå år 2026.